بۆچی نابێت گەشەدان بە براندی کەسی دوا بخەیت بۆ دوای بەدەستهێنانی بڕوانامە و ساڵانی ئەزموون؟

زۆرێک لە ئێمە وا بیر دەکەینەوە کە پێویستە سەرەتا ببینە خاوەنی بڕوانامەیەکی بەرز یان چەندین ساڵ ئەزموونی کارکردنمان هەبێت، پاشان دەست بکەین بە گەشەدان بە براندی کەسیی خۆمان و ناساندنی خۆمان و کارەکانمان بە خەڵکی و ئەو ژینگەیەی کە تیایدا دەژین. بەڵام ڕاستییە تاڵەکە ئەوەیە کە بازاڕی کاری ئەمڕۆ وەکو جاران چاوەڕێی وەرگرتنی بڕوانامەی سەر کاغەز و کۆکردنەوەی دەیان ساڵی ئەزموون ناکات، بەڵکو دەبێت ئێمە بەدرێژایی ئەو ساڵانەی کە تەرخانی دەکەین لە بەدەستهێنانی بڕوانامە و ئەزموونی کارکردن پڕۆفایلێکی کاریگەر دروستبکەین بۆ گەشەدان بە براندی کەسیی خۆمان.

سۆران خوێندکارێکی زیرەک بوو، چوار ساڵی تەواو بە جۆش و خرۆشەوە سەرقاڵی خوێندنی بەکالۆریۆس بوو لە بەشی ئەندازیاری پرۆگرامسازی، ئەو هەمیشە پێی وابوو کاتێک نمرەی بەرز بەدەست دەهێنێت و بڕوانامەکەی وەردەگرێت، لەدەرگای هەر کۆمپانیایەک بدات و سیڤی پێشکەش بکات بەهۆی بڕوانامەکەیەوە بێ شک وەردەگیرێت و بێبەش نابێت لە هەلی کاری گەورە سۆران لە ماوەی خوێندنەکەیدا هیچ چالاکییەکی لە تۆڕە کۆمەڵایەتییەکدا نەبوو، هیچ  کار و چالاکی و ناوەڕۆکێکی تایبەت بە بوارە پیشەییەکەی خۆی بڵاو نەدەکردەوە و پێی وابوو کە ئەو هێشتا ئامادە نییە و دەبێت سەرەتا بڕوانامەکەی وەربگرێت و چەند ساڵێک ئەزموون کۆبکاتەوە، پاشان خۆی پیشان بدات و ناوەڕۆک بڵاوبکاتەوە.

ڕۆژی دەرچوون لە زانکۆ هات و سۆران بە شانازییەوە بڕوانامەکەی وەرگرت، بەڵام کاتێک دەستی کرد بە پێشکەشکردنی سیڤی بۆ کۆمپانیا جیاوازەکان، ڕووبەڕووی بێهیواییەک بوویەوە یان وەڵامیان نەدەدایەوە یان پێیان دەگوت کە ئەوان پێویستیان بە کەسێکە کە کار و چالاکی و ناوەڕۆکی هەبووبێت لەپێشتردا.

لە بەرامبەردا، هاوپۆلێکی تری سۆران کە نمرەکانی لە سۆرانیش نزمتر بوون، بەڵام لەبەرەوەی کە لە یەکەم ساڵی زانکۆوە بەردەوام لە هەوڵی فێربوون و بڵاوکردنەوەی چالاکی و پڕۆژەکانی دابوو لە تۆڕە کۆمەڵایەتی و پیشەییەکان دوو دەرفەتی کاری باشی بۆ هاتبووە پێش. 

لێرەوە سۆران درکی بە کێشە گەورەکە کرد ئەو نەناسراو بوو لە جیهانی پیشەیی و دیجیتاڵیدا وە بۆ کاری کۆمپانیاکان و کەرتی تایبەت بڕوانامەکەی تەنیا ناسنامەیەکی سەر کاغەز بوو کە نەی دەتوانی توانای ڕاستەقینەی ئەو بسەلمێنێت.